加拿祖拒绝庆祝　因为嬲咗曼联球迷！

曼联喺英超主场3比0大胜李斯特城，阿根廷新星阿历真度加拿祖尾段入咗球世界波，不过佢入完波后拒绝庆祝，据队长般奴费南迪斯透露，原来加拿祖因为不满“魔迷”近期针对，所以唔想庆祝。

曼联季初成绩差劲，加拿祖就成为众矢之的，球迷批评呢位20岁小将独食兼经常浪费机会。加拿祖今仗拎到今季第3个联赛入球，成为队中首席射手，但佢入波后并冇“照惯例”去广告版同球迷一齐庆祝，而系好冷静咁自我激励后，木口木面咁继续比赛。

般奴费南迪斯赛后解开疑团：“今场系好日子，球员踢得好好，不过啲球迷好极端，1场波会捧到上天，1场波又会踩到地底泥。加拿祖今场入咗球靓波，但佢冇好似以前咁庆祝，因为佢觉得球迷对佢失去信心。我有叫加拿祖去庆祝，嗰啲‘怨妇’永远都会埋怨，但仲有好多球迷会欣赏同享受你嘅贡献。”