坦哈格又錯　迪基亞助攻費倫天拿6連勝

前曼聯門將迪基亞失業一年後再就業，轉戰意甲費倫天拿愈踢愈出色，周日晚（10日）意甲交出助攻，協助「紫百合」3比1擊敗維羅納，意甲6連勝後升上第3，用表現證明當日坦哈格棄用佢係極度錯誤。

迪基亞至今已為費倫天拿上陣11場，包括9場意甲及2場歐協聯，共失11球，有4場保持清白。作為門將嘅佢，仲有1個助攻數據，非常難得，當時費倫天拿領先維羅納2比1，迪基亞送交摩斯堅恩攻入今場第3球，摩斯堅尼連中三元，亦為球隊奠定勝局，迪基亞呢個助攻對戰局具決定性影響。

費倫天拿現時同國際米蘭、阿特蘭大及拉素同得25分，僅落後榜首拿玻里1分，有機會爭冠，而兩屆英超金手套迪基亞，成為該隊爭冠最強本錢。

34歲嘅迪基亞各項表現都力壓取代佢嘅曼聯門將奧拿拿，佢今季傳球成功率74%，比奧拿拿嘅73%高，對AC米蘭一戰兩救12碼，依家仲有1個助攻，關鍵係迪基亞停咗一年復出，都有咁好表現，因此時至今日，雖然坦哈格已落台，但仍然有唔少曼聯球迷為迪基亞感到不值。