艾摩廉曼联首日返工即开杀戒　云佬惨被踢走

万众期待！曼联新领队鲁宾艾摩廉周一(11日)正式开工，佢抵达卡宁顿训练基地后获球会一众高层迎接，估唔到呢位葡萄牙少帅上任第1日即“开杀戒”！最近带队4场嘅看守领队云尼斯达莱冇得留低，曼联宣布“云佬”同3名教练被炒鱿，将换上艾摩廉喺士砵亭嘅5名心腹助教。

39岁嘅艾摩廉由葡萄牙赴英行程广受关注，英国时间周一中午坐私人飞机抵达曼彻斯特后，由警察护送去卡宁顿训练基地。曼联CEO贝拉达、体育总监艾舒禾夫同技术总监韦确斯都有现身迎接，曼联官方社交平台X更写上：“热烈欢迎艾摩廉，呢度唔只系卡宁顿，仲系一个家。”

当艾摩廉成为曼联大家庭新成员，传奇球星云尼斯达莱就被踢走，同艾摩廉会面后获告知“冇预你”。曼联官方声明表示：“云尼斯达莱永远系曼联传奇，感激你嘅贡献，奥脱福会欢迎你。”今夏回归任助教嘅“云佬”，多次表明想继续留队，任看守领队4仗拎到3胜1和佳绩，可惜最终冇得留低，同样季前加盟嘅助教夏基同另外2名教练亦会离职。

艾摩廉喺士砵亭嘅5名得力助教，亦紧随艾摩廉飞抵曼彻斯特，其中卡路士费南迪斯会成为曼联“第2把交椅”。目前仍等待工作证嘅艾摩廉，会先进行曼联官方访问同安顿生活，虽然大半队球员都返国家队比赛，但仍有拉舒福特、哈利马古尼、美臣蒙特、卡斯米路等球星留低，佢哋将会先率先同艾摩廉见面。