法國鋒線再失1人　京士利高文獲重召救亡

繼基利安麥巴比被法國主帥迪甘斯「棄用」之後，呢支歐洲勁旅再失1位鋒線主力，效力巴黎聖日耳門(PSG)嘅奧士文尼迪比利因為受傷退隊，無緣嚟緊2場歐國聯，迪甘斯補選拜仁慕尼黑翼鋒京士利高文應急。

奧士文尼迪比利疑似有輕傷在身，上場法甲PSG作客昂熱，僅後備上陣，為安全起見，決定放棄出戰今次國際賽，京士利高文成為替代人選。呢位28歲拜仁球星曾經為法國上陣57場入8球，但自從今夏歐國盃後，一直未有入選國家隊，現時終於獲得重召。

除咗鋒線之外，法國防線亦出現傷兵，效力車路士嘅中堅韋斯利科芬拿同樣因傷退隊，迪甘斯補選國際米蘭後衞班捷文柏華特。法國將於11月15日凌晨歐國聯A2組主場對以色列，3日之後作客意大利。