耶馬受傷抖3星期　西班牙補選熱刺棄將

巴塞隆拿上場聯賽不敵皇家蘇斯達後，再傳出傷兵噩耗，西班牙新星拉明耶馬因足踝受傷，要抖2至3個星期，佢已退出西班牙國家隊；另外，巴塞前鋒羅拔利雲度夫斯基亦因為腰傷，唔會代表波蘭出戰歐國聯。

拉明耶馬因傷缺席對皇家蘇斯達嘅聯賽，球隊進攻即時顯得乏力，巴塞官方聲明證實：「檢查證實耶馬右腳足踝出現第1級扭傷，預計要休息2至3個星期；羅拔利雲度夫斯基腰部受傷，大約休息10日左右。」

拉明耶馬退隊後，西班牙宣布補選基羅納翼鋒拜恩基爾，決定令人意外，呢位23歲翼鋒今季由熱刺外借去基羅納，11場聯賽只入1球，表現未見突出，不過佢係領隊富安迪以前喺西班牙U21嘅愛將，因而獲得賞識。