士砵亭新教练登场　佢跟过艾摩廉踢波

葡超劲旅士砵亭主帅鲁宾艾摩廉被曼联撬走后，周一(11日)宣布提拔B队“揸弗人”祖奥彭利拿接教鞭，呢位前葡萄牙国脚虽然年纪大过艾摩廉少少，但挂靴前都喺艾摩廉麾下踢过，相信都学到唔少嘢。

士砵亭成个教练团过晒曼联，球会就决定内部提拔，40岁嘅祖奥彭利拿由B队升上一队，佢球员时代踢右闸，效力过华伦西亚、汉诺威等球会，仲3度为士砵亭效力，包括20/21球季喺艾摩廉执教下比赛，球季完咗佢就挂靴并转任教练，由士砵亭U23教到B队再到一队，平步青云。

祖奥彭利拿正式“坐正”后表示：“我好荣幸，好多谢球会对我嘅信任，我亦要多谢艾摩廉对葡萄牙足球、对士砵亭嘅贡献，佢留低嘅传奇故事唔单止系成就、胜利同纪录，亦系为士砵亭带来嘅团结，我知道自己责任重大，所以我更有动力去为球会争取成功。”