奧迪加特獲挪威放人　阿迪達鬆一口氣

阿仙奴隊長馬田奧迪加特養傷近2個月後，直至月初歐聯對國際米蘭，先至復出，日前隨即被挪威國家隊徵召出戰歐國聯。不過，經過挪威軍醫團隊檢查後，認為呢位25歲中場球星唔夠狀態參賽，批准佢提早前離隊返回阿仙奴，兵工廠主帥阿迪達應該可以鬆一口氣。

馬田奧迪加特喺9月為挪威踢歐國聯對奧地利，整傷足踝，佢剛傷愈復出，又要為國出征，難免令人擔心歷史重演。幸好挪威軍醫團隊今次非常謹慎，建議佢休息，奧迪加特話：「同國家隊軍醫討論後，得到不幸結論，我現時情況唔適合比賽，其實我已經操練一段長時間，但始終太耐冇踢過正式比賽，仲未有100%狀態，好想為國家隊比賽，但都要考慮身體狀況，希望盡快重拾最佳狀態。」

挪威主帥索爾巴肯表示，唔想馬田奧迪加特冒險，所以畀佢返回阿仙奴。挪威將於11月15日凌晨歐國聯作客斯洛文尼亞，3日之後主場對哈薩克。