艾兰加落选国家队真相曝光　因犯两大错误

瑞典国家队主帅汤马臣早前公布出战欧国联大军名单，但却唔见诺定咸森林前锋艾兰加，根据瑞典传媒《Football Channel》爆料，原来呢位22岁新星上月代表国家队期间，出现纪律问题，包括缺阵球队晚餐，仲要唔听领队汤马臣电话，难怪今次被弃用。

瑞典上月2场欧国联对斯洛伐克、爱沙尼亚，艾兰加都做后备，并且冇上阵，可能因而感到不满，球队大胜爱沙尼亚3比0后，佢成为唯一缺席晚餐嘅球员，加上今次落选国家队，舆论认为两件事有关联。

领队汤马臣被传媒问到，艾兰加是否对于冇得上阵感到愤怒，就话：“我唔知艾兰加嬲唔嬲，你应该问番佢，佢近日冇联络过我，我尝试打电话畀佢，但佢冇接听。”汤马臣承认艾兰加今次行为比较罕见，但冇人可以改变到，似乎两人短期内难以和解。

艾兰加今季英超为诺定咸森林上阵11场，贡献2次助攻，但仲未入波，表现只属一般，所以未能获得瑞典主帅汤马臣重用。瑞典将于11月17日凌晨欧国联主场对斯洛伐克，3日之后主场对阿塞拜疆。