【多图】晓姆斯夺“情场金球奖”　新女友索爆

德国中坚晓姆斯今夏约满离开多蒙特，辗转加盟罗马，但被投闲置散，直至10月底先至首次上阵，却不幸摆乌龙，成为球队以1比5大败于费伦天拿脚下嘅罪人之一。不过，呢位35岁老将球场失意、情场得意，挞着索爆女模特儿Nicola Cavanis，佢早前带住呢位新女友出席今届金球奖颁奖礼，获在场男士报以羡慕目光，网民纷纷赞叹晓姆斯夺“情场金球奖”。

据悉晓姆斯已经同Nicola Cavanis拍拖一段日子，直至今届金球奖颁奖礼，先至一齐亮相公众场合。现年25岁嘅Nicola拥有天使面孔及1米75高佻身材，非常抢镜，即使只系陪同“路人甲”晓姆斯出席颁奖礼，都吸引全场传媒关注。

据悉Nicola Cavanis早于少女时候已开模特儿生涯，曾经为多个著名女性内衣品牌拍摄宣传照，佢亦好大方经常喺社交网“派福利”上载性感相片，佢嘅Instagram有超过200万“追随者”。

Nicola本身都系球迷，属于德甲球队奥格斯堡嘅支持者，估唔到依家同效力过拜仁慕尼黑及多蒙特嘅晓姆斯一齐。晓姆斯2022年同前妻离婚之后，搵到第二春，加上已接近挂靴年龄，难怪唔介意喺罗马坐冷板。