「新迪羅斯」上位　英超3大豪門爭奪

意甲球會羅馬今季成績欠佳，名宿主帥迪羅斯及接任嘅教練祖歷都被炒，但其實隊內不乏亮點，20歲中場新星尼高路比斯尼迅速上位，憑瞻前顧後全能踢法，被指似足當年出道嘅迪羅斯，並已進身意大利國家隊，引來英超3大豪門利物浦、車路士、熱刺爭奪。

尼高路比斯尼屬於羅馬青訓球員，上年5月先至首次為一隊上陣，並於12月歐霸盃對舒列夫，第1次入波。呢位新星亦協助意大利奪得上年U19歐國盃冠軍，以及世青盃亞軍，當時已經引起唔少球探注意。

尼高路比斯尼今季更加成為羅馬主力，上陣9場入1球，佢技術全面，擅於策動進攻之餘，防守亦有唔少貢獻，加上速度快及體力雄渾，可以話係1位全能戰士，10月初首次入選意大利大國腳，出戰歐國聯。

英國權威足球媒體《TBR Football》指利物浦計劃收購尼高路比斯尼，會方認為佢非常適合紅軍快速、高效、壓迫踢法，車路士、熱刺同樣睇中尼高路比斯尼，呢位新星下季可能登陸英超。