比宁咸兄弟“国家队”重逢　细佬有望加盟多蒙特

英格兰大小国脚齐集圣佐治公园国家足球中心操练，比宁咸兄弟喺“国家队”重逢，大佬祖迪比宁咸身为“三狮兵团”主将，至于细佬祖比比宁咸第1次入选英格兰U21小国脚，两兄弟同场训练，别具意义，预料不久将来可以喺国家队拍住上。

21岁嘅祖迪比宁咸今季演出唔及上季抢镜，直至上轮西甲，先至打破球会赛事入球荒，上月欧国联对希腊，射入1球，总算渐入佳境。由于2位进攻中场菲尔科顿、高尔彭马因伤冇入选，祖迪比宁咸嚟紧2场欧国联对希腊、爱尔兰孭重飞。

效力英冠球队新特兰嘅19岁细佬祖比比宁咸表现愈来愈成熟，上季英冠上阵45场入7球，今季踢13场已有2球进帐及1次助攻，首次获英格兰U21征召，踢嚟紧2场热身赛对西班牙U21及荷兰U21。

德甲劲旅多蒙特早已关注祖比仔，准备出手收购佢，据悉新特兰要求2,000万镑(约2亿港元)转会费，叫价唔算太高。

多蒙特2020年用2,500万镑买入祖迪比宁咸，上年以近1亿镑出售畀皇马，获利丰厚，祖比将来“升值潜力”可能高过大佬。