雲尼亞里準備出山　第三度執教羅馬

羅馬今季已經先後炒咗2位教練迪羅斯、祖歷，根據《The Athletic》爆料，呢支意甲勁旅正在同雲尼亞里接觸，希望呢位已退休嘅73歲老帥復出擔任看守教練，直至今季結束，如果成事，將會係「雲爺爺」第3度執教羅馬。

雲尼亞里同羅馬非常有淵源，球員時代出身於呢支首都球隊，成為教練後，曾於兩度執教過羅馬，其中2009/10年球季獲得意甲亞軍。雲尼亞里有「球隊醫生」之稱，往往可以點石成事，包括率領李斯特城爆冷奪得2015/16年球季英超冠軍，佢上季協助卡利亞里護級成功後，宣布退休。不過，羅馬現時開到聲，「雲爺爺」躍躍欲試有可能出山，希望幫助母會度過難關。

其實雲尼亞里已經唔係第1次做羅馬「替工教練」，佢喺2018/19年球季，都係季中臨危受命，接手執教羅馬，最終為球隊獲得意甲第6位，講經驗佢絕對係最佳人選。