艾摩廉大變陣　打造蒙特成新核心

魯賓艾摩廉成為曼聯新領隊後，預料會採用佢最擅長嘅3後衞陣式，以3421或343應戰，根據英國《太陽報》爆料，呢位葡萄牙少帥視美臣蒙特為新核心，呢位沉靜多時嘅25歲英格蘭國腳隨時可以大翻身。

據悉魯賓艾摩廉非常欣賞美臣蒙特技術全面，可以勝任中前場多個位置，好適合佢嘅3421同343戰術體系，計劃安排佢擔任正選右翼或者右路進攻中場。

值得一提，杜曹執教車路士時期，都係採用3後衞陣式，美臣蒙特當年出任翼鋒有出色發揮，並於2021/22年球季英超入11球及10次助攻。曼聯前主帥坦哈格慣用4231陣式，安排美臣蒙特踢防中，令佢無所適從。

魯賓艾摩廉嘅陣式或者有助陣美臣蒙特發揮，問題係佢近年經常受傷，能否保持「身體健康」先至係關鍵所在。