丑闻球证欧国杯期间吸毒　坦哈格被炒多得佢

英超丑闻球证大卫古特风波愈闹愈大，日前因公然侮辱利物浦同高普而被停职后，周四(14日)再有震撼影片流出，大卫古特疑似喺今夏欧国杯期间，于欧洲足协嘅酒店内吸毒，欧洲足协随即宣布将佢停职调查。英国职业裁判员公司(PGMOL)主席韦比承认，曼联上月输畀韦斯咸嘅关键12码属误判，该仗球证就系大卫古特。

已喺英超执法6年嘅大卫古特，依家面临更严重嘅指控，最新流出影片据报摄于今年7月6日，欧国杯8强葡萄牙对法国嘅赛后，喺呢场波担任VAR球证嘅大卫古特，喺片段中用美金卷成管状，吸服枱面疑似系可卡因嘅白色粉末，报道指“案发地点”系欧洲足协嘅酒店，欧洲足协即时宣布对佢停职并进行全面调查。

大卫古特丑闻影片连环流出后，唔少关于佢呢几年嘅争议判决亦被挖出，最新鲜系导致坦哈格被曼联炒鱿、上月1比2不敌韦斯咸完场前嘅12码。PGMOL主席韦比周三(13日)承认，大卫古特嘅决定属于误判：“我认为呢球系误判，VAR太集中于马菲斯迪历特出脚踢唔中波，我觉得VAR唔应该介入，由场上球证(大卫古特)决定。VAR唔一定啱晒，大卫古特有权坚持自己决定。”