雲佬閃電回歸？5間英倫球會想搵佢教

魯賓艾摩廉上任後即被曼聯踢走嘅雲尼斯達萊，有望閃電重返英倫球壇！據英國傳媒報道，英冠球會般尼計劃再斟「雲佬」執教，而韋斯咸、熱刺、水晶宮同修咸頓亦虎視眈眈，一旦決定換帥，「雲佬」會係接任熱門人選。

英國《太陽報》報道，雲尼斯達萊暫代曼聯領隊期間嘅表現，得到球圈一致讚賞，領軍4場有3勝1和佳績，加上前季執教燕豪芬亦有突出成績，令唔少球會對佢信心十足。今夏曾力邀「雲佬」執教嘅般尼，依家雖然排英冠第4位，但領隊柏加戰術保守受到批評，近9場賽事只入5球，所以般尼正考慮再向「雲佬」提出斟介。

除般尼之外，消息指幾間考慮換帥嘅英超球會，都將「雲佬」擺喺候選新帥名單，其中韋斯咸盛傳可能短期內炒盧比迪古，有機會「先下手為強」，而水晶宮、熱刺同修咸頓因戰績差勁，都有機會進行換帥，喺英超已證明自己嘅「雲佬」自然成為搶手貨。