云佬闪电回归？5间英伦球会想搵佢教

鲁宾艾摩廉上任后即被曼联踢走嘅云尼斯达莱，有望闪电重返英伦球坛！据英国传媒报道，英冠球会般尼计划再斟“云佬”执教，而韦斯咸、热刺、水晶宫同修咸顿亦虎视眈眈，一旦决定换帅，“云佬”会系接任热门人选。

英国《太阳报》报道，云尼斯达莱暂代曼联领队期间嘅表现，得到球圈一致赞赏，领军4场有3胜1和佳绩，加上前季执教燕豪芬亦有突出成绩，令唔少球会对佢信心十足。今夏曾力邀“云佬”执教嘅般尼，依家虽然排英冠第4位，但领队柏加战术保守受到批评，近9场赛事只入5球，所以般尼正考虑再向“云佬”提出斟介。

除般尼之外，消息指几间考虑换帅嘅英超球会，都将“云佬”摆喺候选新帅名单，其中韦斯咸盛传可能短期内炒卢比迪古，有机会“先下手为强”，而水晶宫、热刺同修咸顿因战绩差劲，都有机会进行换帅，喺英超已证明自己嘅“云佬”自然成为抢手货。