種族歧視孫興民罪成　熱刺主將被罰停賽7場

熱刺中場賓坦古亞被控喺今年6月，接受電視台訪問嗰陣，種族歧視南韓隊友孫興民，據報英格蘭足總已決定作出重罰，判呢位烏拉圭國腳停賽7場。

賓坦古亞今年6月接受烏拉圭電視台訪問，主持人拜託佢拎孫興民嘅波衫，賓坦古亞就回應：「或者可以拎孫興民是但一個表兄弟嘅波衫，因為佢哋個個望落都差唔多樣。」英足總喺9月份正式起訴賓坦古亞種族歧視，雖然孫興民已即時求情，指賓坦古亞事後喊住咁同佢道歉，而「老孫」亦已原諒佢，可惜英足總仍決定用重典懲治。

據英國《每日郵報》爆料，英足總將重罰賓坦古亞停賽7場，「辣手」程度超乎預期；5年前曼城球星貝拿度施華曾喺社交網發布一張「朱古力公仔」，聲稱係隊友班捷文文迪嘅童年照，即使班捷文文迪話唔覺得被歧視，英格蘭足總仍決定處分，但貝拿度施華只被罰停賽1場。