山度士重返巴甲　會長證實斟尼馬回巢

尼馬童話式回歸巴甲？巴西老牌球會山度士，周二(12日)鎖定升班資格後，會長泰斯拿宣布將邀請傳奇前鋒尼馬回巢，如果尼馬1月同希拉爾解約，有機會喺冬季轉會窗實現；山度士計劃最遲明年夏天，等尼馬約滿後，亦會全力促成呢次歷史性轉會。

山度士2年前由巴甲降班，周二喺巴乙擊敗哥列迪巴後，提前鎖定升班資格，會長泰斯拿證實邀請尼馬加盟係重返巴甲後發展大計之一：「我哋有好清晰嘅目標，尼馬爸爸同佢嘅團隊都知道晒，我哋已經傾過幾次。尼馬好熟悉我、好熟悉山度士，但我哋依家要等待，因為尼馬目前仲有合約喺身。」

32歲嘅尼馬同偶像「球王」比利一樣，都係山度士青訓出身，喺2009年至13年間為山度士攻入超過100球，佢同希拉爾合約去到明年夏天完結，不過有傳希拉爾對長期受傷嘅尼馬已失去耐性，有意喺1月同佢提前解約。