曼聯3倍人工留迪亞路　將簽5年新約

曼聯近年積極年輕化，22歲嘅阿密特迪亞路係重點栽培新星之一，佢依家合約明年夏天完結，不過曼聯就準備出3倍人工利誘續約，而呢位科特迪瓦翼鋒亦表明留隊心迹，續約好事近。

迪亞路3年前由阿特蘭大加盟，總轉會費最高可達3,720萬鎊，即使佢未係必然正選，但每次落場都交足功課，深受球迷愛戴。迪亞路同曼聯合約明年夏天到期，球會有權啟動延長1年條款，不過曼聯更想同佢簽長約。

英國《太陽報》報道，曼聯已準備一份5年新約，人工會由依家嘅2.9萬鎊周薪，大幅增加至9萬鎊周薪。迪亞路早前亦表明願意續約：「我喺曼聯好開心，我希望留喺度好長、好長時間，為曼聯創造歷史。」