拉芬夏大手筆　贈耶馬黃金iPhone

巴塞隆拿今季成績大躍進，「三叉戟」羅拔利雲度夫斯基、拉明耶馬同拉芬夏比洛尼神勇表現係重要原因，3人球場上合作無間，球場外一樣關係密切。拉明耶馬早前贏得「U21金球獎」後，拉芬夏竟然送咗一部價值1萬鎊嘅黃金iPhone畀佢做獎勵！

據西班牙傳媒報道，拉芬夏專登搵設計公司訂造黃金iPhone，背面刻有耶馬個名同19號，消息人士透露：「拉芬夏親手送呢份禮物畀耶馬，上面嘅設計都係根據耶馬嘅喜好去整，耶馬覺得好開心，證明佢哋喺場內場外都建立出真正友誼。」

負責設計嘅I Design公司，之前都幫唔少球星專門設計手機，美斯、奇雲迪布尼等球星都係佢哋客仔。I Design發言人話：「拉芬夏同耶馬喺場上非常合拍，球場外亦成為好友，好榮幸可以為呢位神奇嘅年輕球員製造專屬黃金手機。」