杜曹慧眼識英雄　通知拉舒福特準備返國家隊

曼聯前鋒拉舒福特上季狀態低沉，喺英格蘭國家隊亦被放入雪櫃，對上一次代表英格蘭已經係3月份。據報英格蘭新帥杜曹準備出手打救「福仔」，已通知佢做好重返國家隊準備，認定佢係解決英格蘭左路問題嘅最佳選擇。

英國《太陽報》報道，雖然杜曹會喺明年3月先至首次點兵，但佢已通知拉舒福特團隊，希望選佢返國家隊，消息人士透露：「杜曹視拉舒福特為英格蘭計劃重要部分，佢仲話英格蘭今年贏唔到歐國盃冠軍，冇拉舒福特係原因之一，杜曹認為英格蘭左路冇『福仔』威力大減，變成只集中右路進攻。」

英格蘭一直缺乏左翼人才，菲爾科頓客串左翼表現差勁，基亞利殊演出亦唔穩定，新星安東尼哥頓仍未企穩陣腳，所以杜曹希望拉舒福特可以打番起，問題係曼聯依家由新領隊魯賓艾摩廉領軍，如果佢改踢3-4-3陣式，拉舒福特仲係咪主力成為疑問。