蘇比文迪爭奪戰　阿仙奴想一箭雙鵰

西班牙中場蘇比文迪近期人氣高企，喺國家隊代替重傷嘅洛迪卡斯簡迪，表現獲得一致好評，據報曼城、利物浦同阿仙奴3大英超豪門都視佢為頭號獵物。隨住皇家蘇斯達總監奧拉比宣布季尾離任，有傳奧拉比將會同蘇比文迪，一齊加盟阿仙奴！

25歲嘅蘇比文迪被譽為當今最佳組織型中場之一，曼城同利物浦早已對佢垂青，「紅軍」今夏就曾啟動佢合約內6,000萬歐元違約金條款，但最後關頭蘇比文迪決定留隊。皇蘇周三(13日)宣布，總監奧拉比明年夏天將會離隊，對蘇比文迪去向或有決定性影響。

阿仙奴總監伊度早前宣布辭職，球隊仍然物色繼任人，廣受好評嘅奧拉比突然宣布離開皇蘇，自然同阿仙奴扯上關係。奧拉比近年為皇蘇作出唔少頂級增兵，包括依家踢緊阿仙奴嘅馬田奧迪加特、米基爾馬連奴，仲有阿仙奴傳聞目標阿歷山大伊沙克等等，蘇比文迪如果過檔「兵工廠」，將會同唔少舊隊友重逢。