沙拿師弟向利物浦自薦　身價4.2億

利物浦正同穆罕默德沙拿商談續約，未有結果，據報沙拿嘅埃及國家隊師弟、現效力法蘭克福25歲前鋒馬莫殊，近日表態希望追隨沙拿步伐，為利物浦效力，而且雙方已開始有初步接觸。

馬莫殊2017年開始征戰德甲，最初效力禾夫斯堡，其間外借到聖保利同史特加，去年轉投法蘭克福至今，加盟首季攻入17球，今季表現大爆發，上陣16場交出14球10助攻，現時身價估計值5,000萬歐元(約4.2億港元)。

馬莫殊同沙拿係埃及國家隊隊友，上陣34場入6球，將成為沙拿接班人，最近佢明確表態，假如將來轉會，最想去嘅球隊並非拜仁慕尼黑，而係利物浦，法蘭克福亦唔介意出售任何球員，只要轉會費到位，就會放人。

馬莫殊表示，選擇利物浦嘅最大原因就係沙拿，因為沙拿在利物浦相當成功，自己亦有信心加盟利物浦後更上一層樓。