雲尼斯奧斯成巴西黑腳　12碼宴客累失分

巴西前鋒雲尼斯奧斯祖利亞喺皇家馬德里踢到識飛，不過返到國家隊繼續冇料到，周五(15日)朝早世盃外作客委內瑞拉，雲尼斯奧斯12碼宴客兼射中柱，近14次為巴西上陣第13次「食白果」，巴西最終被逼和1比1。

雲尼斯奧斯今場表現活躍，唔少攻勢都由佢發動，13分鐘近門臥射中柱彈出；43分鐘拉芬夏比洛尼禁區頂罰球妙射破網，為巴西半場領先1比0。委內瑞拉換邊後1分鐘閃電追平，巴西隨即展開狂攻，雲尼斯奧斯62分鐘殺入禁區博到12碼，但佢親自操刀射中間被門將擋出，最終兩隊1比1握手言和。

雲尼斯奧斯喺國家隊持續黑仔，36次上陣只係入過5球，對上14場國際賽有13場交白卷，包括今屆世盃外仲未入過波。巴西領隊杜利華祖利亞賽後表示：「除咗委內瑞拉入波之外，我哋表現得好好，一直堅持進攻，呢個係巴西足球嘅特點，不過委內瑞拉門將都有場美妙嘅賽事。」