東拿利開齋　意大利提早出線歐國聯8強

周五(15日)凌晨歐國聯A2組，意大利作客以1比0擊敗比利時，提早1輪取得8強席位。辛度東拿利射入全場唯一入球，打破460日入球荒，亦係佢效力國家隊以來首個入波，呢位「新派路」成功奠定核心地位。

意大利反客為主，上半場佔上風，開賽11分鐘就打開紀錄，迪羅倫素殺入禁區底線傳中，辛度東拿利輕鬆射入空門。呢位24歲中場為意大利上陣第20場首次入波，亦係佢自上年8月英超建功，協助紐卡素大勝阿士東維拉5比1後，相隔460日再次取得入球。

換邊後初段，意大利曾經有1次拉開紀錄黃金機會，列迪古單刀起腳，被門將卡斯迪爾斯撲出。比利時之後搶番唔少攻勢，李安度杜沙特勁射被門將基安盧基當拿隆馬救出，盧卡古頭槌攻門貼柱出界，加上菲斯頭槌攻門中柱彈出，注定比利時無法收復失地，同時未能出線。

至於意大利5戰取得4勝1和排榜首，同組法國打和以色列0比0後，亦取得出線權，意大利同法國將於下周一(18日)凌晨交鋒，爭奪小組首名。