法蘭基迪莊帶傷報國　傷患有排好唔番？

唔少球星選擇喺今輪國際賽退出國家隊，爭取時間休養生息，不過荷蘭中場法蘭基迪莊就一心報國，重傷初愈嘅佢自爆仍受足踝傷患困擾，但仍然想為荷蘭上陣，周日(17日)凌晨歐國聯對匈牙利，有望相隔1年後再為荷蘭出賽。

法蘭基迪莊喺4月份足踝受傷，原本以為問題唔嚴重，點知一抖就抖咗5個月，上場西甲係復出後首度復任正選，依家就即刻入埋荷蘭國家隊。法蘭基迪莊承認傷患仍未好番晒：「呢個係好痛苦嘅傷患，每場比賽或者練波前，我都要特別治理足踝，例如敷冰同其他準備，而且相信要持續一段日子，我嘅足踝可能需要更長時間嘅護理。」

法蘭基迪莊對上一次為荷蘭上陣，已經係上年9月對愛爾蘭，領隊朗奴高文亦表明法蘭基迪莊唔會喺最佳狀態：「我相信佢可以上陣，但佢目前可能要先單獨操練，考慮到佢咁長時間冇比賽，依家狀態肯定唔會係100%，不過佢對球隊非常重要。」