艾摩廉警告球員：着曼聯波衫就要認清身份

曼聯新領隊魯賓艾摩廉首次接受球會官方媒體訪問，暢談發展大計，特別提到球員必須認清自己身份，以效力紅魔鬼為榮，要有歸屬感，全力為球隊付出，似乎暗示如果有球員「懶懶閒」，就會毫不留情踢走。

魯賓艾摩廉首先提到之所以接受曼聯邀請執教，主要有兩個原因：「第一，我認識曼聯內部人士，大家有聯繫，呢點非常重要，因為我想同自己喜歡嘅人一齊工作。第二，曼聯擁有輝煌歷史，所有人都希望喺呢度工作，我想為曼聯做特別嘅事。」2018年魯賓艾摩廉考取教練資格，曾經到曼聯深造同實習，早已同紅魔鬼建立聯繫。

至於講到教波理念，呢位39歲葡萄牙少帥話團隊精神最重要：「好多人講我用433、343陣式，呢方面都唔係重點，球員性格、身份認同先至係重點，球員着上呢件球衣，就要知道自己代表曼聯，一齊向共同目標進發，就係贏波。」

曼聯近年成績欠佳，艾摩廉認為球員應該忘記過去不快回憶，內心唔好存在恐懼，先至可以搵番勝利感覺，但承認需要時間改變。