艾摩廉重建曼聯第一簽　可能係土超兵

魯賓艾摩廉即將返新工，佢嘅領軍能力喺英超work唔work好快知，至於重建曼聯第一簽亦會揭盅，據報收購目標係來自土超，係加拉塔沙雷24歲翼鋒尤奴斯艾根。

尤奴斯艾根係新晉土耳其國腳，加拉塔沙雷青訓產品，2018年出道，曾外借到國內球會，上季以借將新份為李斯特城爭升班，上陣29場入2球，對於喺英格蘭比賽唔會陌生，今季重返加拉塔沙雷，交出6球2助攻，身價僅650萬歐元(約5,300萬港元)，相當抵玩。

土耳其傳媒報道，艾摩廉執教士砵亭時已經關注艾根，依家過檔曼聯後，已將其納入收購名單，曼聯將派出球探考察其表現，直至明年1月。

艾摩廉發掘人才係有一手，士砵亭嘅瑞典神鋒約基利斯，去年佢用2,000萬歐元由高雲地利簽入，到依家已經成為歐洲其中一名炙手可熱前鋒，身價升到7,000萬歐元，依家佢幫曼聯平價簽入艾根，可能又會發掘另一位頂級球員。