阿仙奴再中FIFA病毒　杜沙特伤出比利时输波

阿仙奴再受“FIFA病毒”袭击！周一(18日)凌晨欧国联A2组，比利时作客0比1输畀以色列，中场李安度杜沙特喺上半场勇战受伤，要提早退下火线，成为阿仙奴近3个国际赛期第5个受伤球员。

比利时今场残阵出战，37分钟更有杜沙特受伤，佢行出场嗰阵一拐一拐，暂时未知伤势程度。比利时攻极唔入，完场前4分钟更被主队嘅舒亚入波，最后惨输0比1，将要出战护级附加赛。

比利时领队泰迪斯高赛后表示：“今场有好多问题，赛前已经有唔少伤兵，杜沙特喺上半场又伤埋，今仗踢得唔好，个环境实在太差。”

阿仙奴喺9月份国际赛，有卡拉科利同马田奥迪加特受伤，10月份国际赛就有布卡约沙卡同加比尔马天尼利负伤而回，今轮国际赛又到杜沙特“出事”，认真黑仔。