on.cc东网直播 新加坡回勇等睇大骚
2024年11月18日 17:00
东网电视
更多新闻短片
新加坡主场迎战中华台北。
收看直播，请按直播ICON，或按下面链结：
今晚东网直播送上国际热身赛，由新加坡主场迎战中华台北。新加坡日前上演奇迹大逆转，成功止跌士气大振，中华台北虽然连场输波，但依然有前冇后、打死罢就，加上两军近年碰头例多波入，今场随时又会合演入球骚。（on.cc东网周一晚8时直播）
新加坡早前喺世杯外亚洲区第2圈，于C组6战只得1和5负，包尾出局，所以依家打到如火如荼嘅第3圈，同佢哋完全无关，不过“狮城”亦有另一任务，就系嚟紧12月中举行嘅东南亚锦标赛，同组有泰国、柬埔寨、马来西亚及东帝汶，因此借住今个月两场“拍跳”为东南锦开打前作最后备战。
新加坡于日前同缅甸踢咗场热身赛，犹如坐过山车般刺激，佢哋先开纪录后竟畀对方连下两城，劣势下凭后备入替嘅法里斯兰利交出2个靓助攻，协助球队末段连入两球反胜3比2，总算终止近6场未赢过嘅颓势。淡滨尼流浪嘅日本中场仲村京，上月成功入籍新加坡，仲喺对缅甸之役首度披甲，表现不俗，更被选为最佳球员，赛后佢话唔太满意整体演出，认为需要踢得沉着，同埋要更有饥渴感，但有呢位前日本U17成员助阵，对进攻组织有明显提升。
另边厢，同样喺世杯外亚洲区第2圈出局嘅中华台北，阵中较为港人熟悉嘅，除咗曾执教港队嘅主帅加利韦特外，亦有曾经喺港超联搵食嘅蔡立靖及陈庭扬，当然唔少得老大哥、中华台北史上最佳射手陈柏良。不过中华台北状态欠佳，各项赛事已经连输7场，合共失咗20粒，包括日前同柬埔寨“拍跳”输2比3，但呢班波仍坚持有前冇后、打死罢就，况且近4次对住新加坡，有3次开3球或以上，今仗入球唔慌少。
收看直播，请按直播ICON，或按下面链结：