傳同艾雲高域不和　武磊被打入冷宮

中國前鋒武磊近年一直係國家隊嘅Icon，不過最近中國隊喺世盃外連贏2場，武磊都因傷未有上陣，近日更傳出武磊同主帥艾雲高域不和。有消息人士踢爆，武磊今年6月曾經拒絕正選上陣，之後又同艾雲高域發生衝突，令呢位老將喺國家隊前途亮起紅燈。

武磊今輪國際賽有入選集訓名單，但好快就報稱受傷提前退隊，唔少網媒紛紛踢爆當中另有內情，有指武磊喺今年6月對南韓嘅36強賽生死戰，曾以「未準備好」為由拒絕艾雲高域擺佢做正選；另外9月對沙特阿拉伯一仗，武磊被換走曾大發脾氣，而且無視艾雲高域直接返位，令兩人不和傳聞甚囂塵上。

據報艾雲高域打算趁機擺脫中國隊嘅「武磊依賴症」，張玉寧、林良銘同新人拜合拉木都係艾雲高域信賴嘅前鋒，如果中國嚟緊迎戰日本繼續拎到好成績，武磊想重奪正選位置將非常困難。