艾摩廉欽點　曼聯搶購17歲「新C朗」

魯賓艾摩廉成為曼聯新帥後，預料會向前度球會士砵亭挖角，英國《太陽報》指呢位葡萄牙名帥最想簽入17歲新星昆達，皆因佢潛力優厚，隨時可以重演當年C朗以18歲之齡成「魔」，走上巨星之路。

雖然盛傳曼聯頭號收購目標係士砵亭射手約基利斯，但呢位瑞典國腳已經26歲，超過曼聯班主拉特克利夫只簽25歲以下球員嘅規定，所以魯賓艾摩廉未來增兵，都要向年輕球員埋手，佢心目中已有人選，就係自己一手提拔嘅昆達。

出身於士砵亭青年軍嘅昆達上季已多次獲魯賓艾摩廉徵召上一隊，今季更加備受重用，為士砵亭各項賽事上陣17場入2球，並進身葡萄牙大國腳，有昔日C朗影子。

昆達技術比C朗更全面，除咗司職右翼之外，亦勝任第2前鋒，甚至可以踢右閘，簡直係攻守兼備。據報曼聯願意以3,300萬鎊(約3.25億港元)收購昆達，但佢早前續約至2027年，毀約金提升至8,400萬鎊(約8.3億港元)，恐怕曼聯需要加碼先至可以買到呢位「新C朗」。