巴西未衰完　世盃外又和波

周三(20日)世界盃外圍賽南美洲區賽事，巴西又失分，主場出擊只能逼和烏拉圭1比1，連續2場和波失分，「足球王國」霸氣蕩然無存，領隊杜利華祖利亞帥位愈來愈危。

巴西上周五(15日)作客被弱隊委內瑞拉逼和1比1，今仗返回自己地頭，遇到勁敵烏拉圭，亦佔唔到優勢，更於55分鐘先失守，烏拉圭中場費達歷高華維迪喺禁區邊，推橫後勁射入網打開紀錄。

7分鐘後，巴西憑中場謝臣山度士入波扳平，戰至比賽末段，「森巴兵團」幾乎可以反超前，可惜拉芬夏比洛尼勁射僅高出，最終打和1比1。

巴西今屆世盃外12戰只有5勝3和4負，排南美洲區第5位，雖然出線機會仍然樂觀，但落後榜首宿敵阿根廷7分，令球隊顏面掃地。加上以巴西目前表現，就算參加2026年世界盃，都難以取得佳績，預料領隊杜利華祖利亞嘅帥位坐唔穩，盛傳一旦安察洛堤提早明夏離開皇馬，巴西足總可能再次提出邀請佢執教。