8.7億梅迪歷變籮底橙　水晶宮提出借用

身價達8,800萬鎊(約8.7億港元)嘅車路士翼鋒梅迪歷，今季被新領隊馬利斯卡投閒置散，僅7次英超上陣，其中只有2次擔任正選，成為冗員。另一支倫敦球隊水晶宮有意提出借用呢位23歲烏克蘭國腳，可能成為佢翻身好機會。

梅迪歷上季英超31次披甲有5球進帳，看似有起色，但今季又打回原形，長居後備，只能喺盃賽踢正選，當中喺歐協聯射入2球。不過，一般相信梅迪歷已經唔屬於馬利斯卡計劃之內，被外借或者出售只係時間問題。

水晶宮近年先後失去2位主力翼鋒韋費特沙夏、米高奧利斯，人腳實力受削，成績每況愈下，現時已跌至聯賽尾三降班區，需要增兵打護級戰，因而打算借用梅迪歷，提升鋒線力量。

車路士以往曾經將中場干拿加歷查外借去水晶宮磨練，今次外借埋梅迪歷畀對方都唔出奇。