利迷變神探　紅軍年曆預示3主將續約成疑？

利物浦今季成績彪炳，不過穆罕默德沙拿、華基爾雲迪積克同阿歷山大阿諾特嘅續約問題成為隱憂，3大主力明年夏天就回復自由身，但續約遲遲未有聲氣，而利物浦日前推出2025年年曆，利物浦球迷睇完就更加擔心！

利物浦推出嘅2025年年曆售價係10.99鎊，12位最Top球星每個月輪流擔大旗，3位「續約目標」當然榜上有名，不過佢哋被安排喺2月(阿諾特)、3月(沙拿)同4月(雲迪積克)孭飛，就被「利迷神探」懷疑係刻意安排，因為佢哋喺上半年鐵定仲係利物浦球員，所以要趁早推出，避免下半年一旦約滿離隊，買咗年曆嘅球迷要對住個已離隊球員嘅尷尬情況。

一直有傳皇家馬德里對阿歷山大阿諾特志在必得，希望佢接替丹尼爾卡華積嘅右閘位置，而穆罕默德沙拿亦盛傳係沙特球會嘅主要獵物，華基爾雲迪積克早前對續約問題不置可否，不過普遍認為佢係最大機會續約嘅1個。