桑馬達做美職新軍老闆　碧咸後第2人！

曾效力曼聯、車路士等豪門嘅西班牙球星桑馬達，周三(20日)宣布成為美職新軍FC聖迭戈老闆之一，係碧咸後第2個持有美職球會股份嘅球員，更係現役球員中第1人！

現年36歲嘅西班牙中場桑馬達，發表聲明證實：「加入FC聖迭戈做合伙人係個令人興奮嘅計劃，希望可以幫手創造一啲特別嘅成就。」桑馬達今年9月加盟澳職球會西悉尼流浪者，FC聖迭戈表明佢係第1個持有美職球會股份嘅現役球員。

FC聖迭戈大老闆係埃及商人穆罕默德文梳亞，佢同時亦係丹麥球會洛斯查蘭特班主，佢亦歡迎桑馬達加入：「好開心桑馬達成為合作伙伴，佢係天生勝利者，同我哋有相同足球理念。」FC聖迭戈將喺2025年加入美職聯賽，喺西岸角逐。