韋拉成熱拿亞新帥　巴洛迪利冇運行？

意甲球會熱拿亞周三(20日)落實聘請韋拉執教，受到最大打擊嘅，可能係上個月先加盟嘅巴洛迪利！「巴神」同韋拉過去曾經3次合作，不過最後一次喺尼斯就不歡而散，今次第4度共事會有咩結局？

熱拿亞宣布由韋拉代替基拿甸奴出任主帥，令佢同巴洛迪利第4度合作，兩人之前喺國際米蘭同曼城都做過隊友，18/19球季韋拉執教法甲球會尼斯，「巴神」亦係球隊主力。當時巴洛迪利啱啱「翻生」，喺17/18球季攻入26球，但韋拉上任後佢就失寵。

「巴神」之前曾經喺訪問入面表示：「當時我生活過得好好，日日都笑容滿面，問題係韋拉嘅戰術唔適合我，我對佢冇惡意，只係競技上有唔同意見，如果唔係韋拉，我唔會離開尼斯。」韋拉周四(21日)主持熱拿亞操練，曾經同巴洛迪利密斟，星期六(24日)主場對卡利亞里會係韋拉首次領軍。