韦拉成热拿亚新帅　巴洛迪利冇运行？

意甲球会热拿亚周三(20日)落实聘请韦拉执教，受到最大打击嘅，可能系上个月先加盟嘅巴洛迪利！“巴神”同韦拉过去曾经3次合作，不过最后一次喺尼斯就不欢而散，今次第4度共事会有咩结局？

热拿亚宣布由韦拉代替基拿甸奴出任主帅，令佢同巴洛迪利第4度合作，两人之前喺国际米兰同曼城都做过队友，18/19球季韦拉执教法甲球会尼斯，“巴神”亦系球队主力。当时巴洛迪利啱啱“翻生”，喺17/18球季攻入26球，但韦拉上任后佢就失宠。

“巴神”之前曾经喺访问入面表示：“当时我生活过得好好，日日都笑容满面，问题系韦拉嘅战术唔适合我，我对佢冇恶意，只系竞技上有唔同意见，如果唔系韦拉，我唔会离开尼斯。”韦拉周四(21日)主持热拿亚操练，曾经同巴洛迪利密斟，星期六(24日)主场对卡利亚里会系韦拉首次领军。