好波有好報　阿仙奴開肥約綁實杜沙特

阿仙奴翼鋒李安度杜沙特雖然並非必然正選，但每次上陣都交足功課，深得領隊阿迪達歡心，根據英國《每日郵報》爆料，兵工廠準備加薪同呢位29歲比利時國腳續約。

李安度杜沙特上季為阿仙奴上陣46場入17球，雖然今季表現有所走下坡，15次披甲僅入2球及1次助攻，但佢技術全面，靈活走位踢法，仍然發揮關鍵作用，所以會方願意向佢開出新合約，並提升薪酬。

李安度杜沙特2023年1月由白禮頓加盟阿仙奴，簽約4年，獲得9萬鎊(約88萬港元)周薪，估計一旦續約，人工有望增加至10萬鎊(約98萬港元)周薪以上。

杜沙特喺早前歐國聯為比利時出戰以色列，勇戰受傷，未知能否踢周六(23日)晚英超主場對諾定咸森林。