世紀重逢？摩連奴短訊邀C朗投費倫巴治

葡萄牙球星C朗拿度39歲仍然踢出高水平，佢同艾納斯嘅合約明年夏天完結，據報曾經同C朗共事嘅摩連奴，正密謀邀請C朗加盟費倫巴治，並且發短訊向C朗送出邀請。

土耳其媒體《Fotomac》報道，摩連奴正嘗試遊說C朗重返歐洲，並向佢發出短訊：「你喺沙特開心嗎？有聽聞你想離開，如果你真係離開，你會想嚟費倫巴治嗎？」報道仲話費倫巴治總監白蘭高，已經同C朗經理人佐治文迪斯聯絡，了解C朗目前情況。

C朗同摩連奴曾經喺皇家馬德里合作3季，關係唔錯，39歲嘅C朗曾暗示會至少踢到2026年世盃之後，如果佢選擇加盟費倫巴治，將有機會重返歐聯舞台，繼續刷新佢嘅入球紀錄。