巴塞明年與耶馬續約6年　違約金82億

巴塞超級新星拉明耶馬合約2026年夏天到期，據報當佢明年7月滿18歲時，巴塞將會同佢簽一份為期6年新合約，違約金係天價嘅10億歐元(約82億港元)。

西班牙傳媒報道，耶馬要到明年7月13日先滿18歲，但佢早已經成為巴塞主力，今季上陣16次，當中15次正選，交出6球8助攻，日益受到重用。

因此巴塞已經計劃好同耶馬續長約，先同佢簽6年約，違約金高達10億歐元，而事實上巴黎聖日耳門已經蠢蠢欲動，打算明夏開價2.5億歐元(約20億港元)收購。

拉明耶馬經已獲得隊中老大哥羅拔利雲度夫基斯認可，「羅拔佬」表示，正為耶馬嘅成長提供幫助，佢話：「我會向佢提供好多建議，不單止係未來2、3年，而係未來10年應該點做，確保佢整個生涯可以長期處於最高水平。」