阿仙奴爭標受打擊　賓韋特長抖數個月

英超勁旅阿仙奴爆出不利消息，防線主力賓韋特嘅傷患康復進度緩慢，領隊阿迪達透露，呢位27歲右後衞需要休息數個月，意味將缺陣今季大部分賽事，對於兵工廠爭標造成沉重打擊。

賓韋特上輪英超上陣對車路士，整傷膝部，阿迪達最新表示，呢位守將傷勢令人擔憂：「賓韋特嘅情況比較複雜，同以往好唔同，仍然冇明顯改善，我哋需要保護賓韋特，佢將會缺陣數個月。」

賓韋特上季為阿仙奴各項賽事上陣51場，並有4球進帳，屬於球隊爭標主力，但今季只有12次披甲。由於阿仙奴缺乏副選右後衞，賓韋特之前缺陣期間，甚至需要中場湯馬士柏迪客串右閘，佢今次長抖，兵工廠可能需要喺明年1月冬季轉會市場重開後，簽入右後衞。