美斯益自己友　國際邁亞密請馬斯真蘭奴執教

國際邁亞密教練馬天奴辭職後，會方已有新帥人選，同樣係擁有阿根廷及巴塞隆納背景嘅馬斯真蘭奴，根據「轉會權威」記者羅曼諾(Fabrizio Romano)爆料，呢位40歲少帥已經同意領軍，意味佢將會同昔日隊友美斯再次合作。

美斯加盟國際邁亞密後，會方聘請教練都係為佢度身訂造，上任主帥馬天奴執教巴塞隆拿及阿根廷國家隊時期，早已同美斯合作過，今次搵來馬斯真蘭奴接掌帥印，相信都係呢位37歲球王嘅意思，因為兩人曾於巴塞隆拿做過8年隊友，亦喺阿根廷國家隊並肩作戰多年，私下關係非常好。

加上國際邁亞密隊內仲有蘇亞雷斯、布斯基斯、佐迪艾巴3位前巴塞球員，由馬斯真蘭奴領軍，大家肯定同聲同氣。

馬斯真蘭奴2020年掛靴後，擔任阿根廷U20及U23主帥，包括領軍參加今屆巴黎奧運男足，但係8強出局，教波經驗尚淺，能否帶領國際邁亞密創出佳績，實屬疑問。據悉利華古遜名宿柏拉辛迪將接替馬斯真蘭奴，執教阿根廷U20。