3英超隊洽購尼高威廉斯　阿仙奴有份

意大利傳媒爆料，畢爾包西班牙翼鋒尼高拉斯威廉斯受到3支英超球隊挖角，有球隊更會啟動5,000萬歐元(約4.1億港元)違約金條款，因此祖雲達斯已經打退堂鼓。

22歲嘅尼高威廉斯一直係歐洲各豪門目標，今夏協助西班牙捧走歐國盃，佢同拉明耶馬雙翼齊飛令人印象深刻，當時好多人以為巴塞隆拿會簽佢，但結果佢仍然留喺畢爾包。

明年1月轉會窗又到，報道稱祖記打算向畢爾包洽購，但當知道有3支英超隊打算出手，仲會啟動違約金條款，祖記唯有放棄。

據估計，3支英超隊分別係阿仙奴、利物浦同紐卡素，當中以阿仙奴傳得最勁，認為「兵工廠」加強翼鋒實力，以尼高威廉斯取代加比爾馬天尼利，增加爭標本錢。