馬度基超敗家！車路士照擒狐狸

周六晚(23日)英超早場，馬利斯卡率領車路士重返皇權球場倒戈鬥李斯特城，結果車路士2比1小勝「狐狸」，全取3分後企穩聯賽第3，「藍戰士」其實可以更大比數取勝，衰在馬度基超敗家錯失多次機會所致。

車路士人腳充裕，今場由祖奧菲歷斯同安素費南迪斯擔正，李斯特城亦有占美華迪復出，兩軍交鋒立即一面倒，車路士壓住打，祖奧菲歷斯初段兩次試探式射門，15分鐘先開紀錄，尼高拉斯積遜壓入禁區腳面一彈入網，車路士領先1比0。

李斯特城今場埋門次數唔多，基斯麥艾達一次右路施射，結果貼柱出界，其後尼迪迪空晒起腳竟然撻Q，令人失望。

不過李城點嘥機會，都唔及車路士嘅馬度基，呢位英格蘭翼鋒先食「詐胡」，完半場前逗射空門唔中目標，最離譜係下半場高爾彭馬射空門，佢喺龍門口避唔切擋咗個波出界，連番錯失機會。

直至75分鐘車路士終於攞到「燕梳球」，安素費南迪斯門前頭槌「執死雞」成2比0，亦係該阿根廷中場今季英超「開齋」入波。

李斯特城喺補時90+4獲得12碼，佐敦阿休操刀破網，追成1比2完場。