利物浦贏波帶出8分　施洛唔認等捧盃：上季阿仙奴...

今季演出勢如破竹嘅利物浦，周日(24日)英超作客3比2反勝修咸頓，近14場賽事錄得13勝1和嘅完美成績。「紅軍」依家喺英超榜首帶出8分，被一致睇好可重奪聯賽冠軍，不過領隊施治賽後就唔認「等捧盃」，企圖降溫話：「睇下上季阿仙奴...」

利物浦今場控制戰局，蘇保斯拉爾30分鐘藉修咸頓解圍失誤射入領先，主隊完半場前獲爭議12碼，阿當岩士唐操刀被救出，幸佢反應夠快成功補射追平。56分鐘修咸頓精彩反擊，由馬迪奧斯費南迪斯入波意外領先，不過利物浦始終技高一籌，穆罕默德沙拿65分鐘追平，83分鐘再操刀12碼建功，為利物浦贏3比2。

利物浦依家領先次席曼城8分，捧盃形勢大好，但領隊施治就自潑冷水：「依家嘅位置的確好好，不過我哋唔會自視過高，今季可能得1、2場大勝，大部份比賽都係勝負一線之差，我記得上季阿仙奴上季喺球季後段領先曼城8分，一樣都被追上......曼城、阿仙奴、車路士呢啲球隊都有能力踢出一段連勝走勢。」