沙拿赛后自白：离队机会多过留队

利物浦寻晚3比2反胜修咸顿，穆罕默德沙拿连入2球再做救世主，佢赛后罕有留喺混合区接受访问，向传媒公开讲自己续约情况，坦言利物浦仲未开出新合约，所以自己离队机会多于留队。

沙拿效力利物浦7年，以往只曾试过两次赛后接受记者提问，一次系效力第1季攻入第40球，另一次系欧联决赛击败热刺捧杯赛后，有随队记者指出，今次系沙拿第3次赛后接受访问，而沙拿今次仲主动讲到续约问题。

沙拿表示：“好快就12月，我仲未收到新合约。 可能更接近离队，我喺度踢咗咁多年，冇其他球队比得上，不过呢啲嘢唔系我话事，亦唔系球迷可以决定。”

之后其再补充：“我唔会咁快挂靴，打算留喺高水平赛事，依家只会专注目前，目标系英超冠军，希望赢埋欧联，我好失望，睇睇仲会有咩事发生。”

据报利物浦已经同沙拿经纪接触，不过由于沙拿身价不菲，周薪高达35万镑，而且仲有华基尔云迪积克同阿历山大阿诺特未续约，所以唔会急于成事。