足踝骨折照頂1個鐘　熱刺門神做手術長抖

熱刺日前喺英超作客4比0大炒曼城，不過周二(26日)傳出噩耗，門將古里莫維卡里奧突然宣布因足踝骨折做手術，預計要養傷「幾個月」時間，消息指佢喺對曼城比賽中已受傷，但就帶傷頂咗1個鐘頭賽事，真係能人所不能。

熱刺發聲明表示：「維卡里奧已進行手術治療右腳足踝骨折傷患，軍醫會繼續為佢做檢查，睇下幾時可以重投操練。」據英國《每日郵報》報道，維卡里奧嘅養傷期將長達「幾個月」，熱刺已準備1月轉會窗簽新門將，同老將費沙科士打分擔頂替任務。

意大利國腳維卡里奧喺手術後亦表示：「足球有時會畀你興奮，有時又會畀人意想不到嘅挑戰，我喺對曼城一仗足踝骨折後仍踢咗60分鐘...我為球隊付出一切...好可惜最後都係要做手術...我哋之後喺球場上再見！」