阿仙奴翻生　作客炒士砵亭追平21年紀錄

英超勁旅阿仙奴近況回勇，周三(27日)凌晨歐聯作客5比1大破士砵亭，追平球會史上歐聯最大作客勝利紀錄，同時粉碎士砵亭超過1年嘅主場不敗之身。

阿仙奴對上4場歐聯作客0入球，不過今仗就踢到水銀瀉地，上半場已由加比爾馬天尼利、夏維斯同加比爾馬加希斯各建一功，領先3比0。士砵亭換邊後2分鐘破蛋，氣勢一度反壓阿仙奴，但布卡約沙卡65分鐘射入12碼，將士砵亭嘅火氣淋熄，李安度杜沙特再喺82分鐘錦上添花，助阿仙奴大勝5比1。

阿仙奴喺2003年作客5比1大勝國際米蘭，係球隊喺歐聯最大作客勝利，今場成功追平呢項21年前紀錄，領隊阿迪達賽後表示：「呢場係標誌性嘅贏波，我哋對住巴黎聖日耳門、國際米蘭等勁旅都踢得好好，球員需要面對同克服呢種水平嘅對手，從而製造更多自信。我哋知道自己有呢種能力後，下一步就係提升穩定性。」