PSG被金玟哉頂爆瀕出局　安歷基獲免炒金牌

周三(27日)凌晨歐聯大戰，拜仁慕尼黑主場憑南韓中堅金玟哉頂入全場唯一入球，1比0擊敗法甲勁旅巴黎聖日耳門(PSG)。PSG輸波後繼續沉淪淘汰區，不過班主艾卡理化就向教練安歷基頒「免炒金牌」，講明就算歐聯出局都唔會換帥。

今場大戰戰況唔算激烈，唯一入波出現喺38分鐘，拜仁角球攻勢令門前出現混亂，並由金玟哉近門頂入。PSG下半場力圖反撲，但奧士文尼迪比利喺57分鐘兩黃一紅被逐，PSG最終返魂乏術。PSG今屆5戰只得4分排喺淘汰區，最後3輪歐聯分別對薩爾斯堡(客)、曼城(主)同史特加(客)，出線形勢唔樂觀。

安歷基賽後表示：「上半場我哋入唔到局，適應唔到拜仁嘅緊逼，下半場本來好好多，但迪比利嘅紅牌令唯一機會都失去，不過球員好有決心，要為呢場輸波負責嘅人係我。」不過，PSG班主艾卡理化賽前先派定心丸，講明歐聯出局都唔會炒安歷基：「無論歐聯係咩成績，安歷基都會留低，球隊依家重建緊，需要時間，我為呢支球隊感到光榮。」